అరచేతి గీతవై .....

అరచేతి గీతవై ..... (ఘజల్ )

అరచేతి గీతవై నీవు తలరాత మార్చవా
 చిరుదీప కళికవై నా మది చీకటుల చిదుమవా

కెంజాయ సూర్య కాంతిన మరుమల్లె పొదలలా
మరుమల్లె పొదల పైన పరచిన వెన్నెల్ల వెలుగులా
కలిగించు కాంతి నా బ్రతుకున కరుణింత జూపుచూ     ||అరచేతి గీతవై||

బ్రహ్మాణి లేత చేత పలికే రాగాల వీణలా
రాగాల వీణ తీగలపై కొనగోటి మీటులా
రవళింపజేసి నా మదిని రంజింప జేయుచూ           ||అరచేతి గీతవై||

పరువాల పట్టుచీరకు సరసాల సరిగెలా
సరసాల సరిగే తీగలకు సమకూరు వెండిలా
అందాలు చిందు అంబరమై అలరింప జేయుచూ        ||అరచేతి గీతవై||


ఆనంద నందనారామపు అందాల కొలనిలా
అందాల కొలనిలో మెలిగే అరుదైన మీనులా
నివసించి పరవశింపగా నా ఊహల్ల నూగుచూ              ||అరచేతి గీతవై||