రామ చిలుక

రామ చిలుక

చక్కనైన రూపు సౌశీల్య గరిమంబు

మాటకారితనము మంచి విద్య

ఎన్నియున్ననేమి  ఈ రామ చిలుకకు

గండుబిల్లి ముందు దండుగయ్యె

ఈ పద్యము జగన్నాథ పండితరాయల సంస్కృత శ్లోకమునకు ఒక కవి చేసిన చక్కని తెలుగుసేత. చిలుక యొక్క గుణగణములను తెలియబరచే పద్యము ఇది. భావము కష్టము కాదు కానీ తెలియజేస్తాను. చక్కనిరూపము, గొప్పదగు శీలము, మాటకారితనము, మంచివిద్య వంటివి ఎన్ని ఉన్నా ఈ రామచిలుక గండుబిల్లి ముందు దండుగే!

ఈ పద్యమును ఎందుకు ఇప్పుడు తెలిపినానంటే ఒక్క చిలుకకు మాత్రమే రామ అన్న విశేషణము తగిలించుతారు. చిలుక ఆడదయినా మగదయిన ఒక్కరికి మాత్రమే మనసిస్తుంది. అది శ్రీరామ చంద్రుని లక్షణము కాబట్టి ఆ పక్షికి మాత్రమే ‘రామచిలుక’ అన్న పేరు వచ్చింది.